ضيف من ضيوف الرحمن

[غير مسجل]

غريبة الزول يجي ضيف ويدخل الصالون وما يلقى اليضيفوا !!!
انا لست من هواة المنتديات ولكني اعرف حروف مبعثرة هنا وكأني
اعرف اصحابها ولهذا انخت راحلتي في صالون الضيوف عل الزمن
يقسم لى من دقائقه لكي استمتع ببقية الكلام .


سلام اهل العازة وقنبو طولا

ضيف من ضيوف الرحمن

[ريم]

يا ضيفنا إن جئتنا
لوجدتنا نحن الضيوف وأنت رب المنزل

هلا بضيف الرحمن ..
اتفضل لجوه والدار دارك
ونتمنى أن تمتد زيارتك طول الأمد
مرااااحب

[ست الدار]

غريبة الزول يجي ضيف ويدخل الصالون وما يلقى اليضيفوا !!!



يا عيب الشؤم .. كيفن ما تلاقي البضيفك .. ؟؟!!

لكن انت يا ضيف الرحمن .. واقف قبلك جنب الباب .. كيفن عاد نضيفك في الشارع كدي ... اتفضل لجوووة الحوش .. وشوف الضيافة بهناك كيف!!

عذرا للتاخير ... التلفزيون صوتو عااااالي ... مع كأس العالم .. ما بنسمع دقة الباب ... بقينا !!


ستووو

[ثابت محمد]

أخي الضيف الكريم
عليك السلام ولك الإحترام
العازة عازتك والصالون صالونك
لو مالقيت زول برضو البيت بيتك
خد راحتك والسراير مفروشة والعصير من وريدنا
شكراً لزيارتك وندعوك لأخذ بطاقة العضوية
حروفك مرتبة وفكرك مرتب وإحساسك عالي
الصالون مفتوح من أجل معرفة مقترحاتك وإنطباعك عن الموقع

لك كل الود وخوالص المحبة

[غير مسجل]

ريم أشكرك حتى تستغيثى
شكراً لدعواتك ودعواتك .

ست الدار
علو صوت الجرس عشان تسمعمو خبيت الباب !!!
كأس العالم مسخن والرطوبة كمان زايدة زيادة بس ربك يستر
الحقيني بي جك ليمون باااااااااااااااااااارد

شكراً لحفاوتك سيدتي .

ثابت ولا حركة !! ما قرأت في عنوان احدى البوستات هنا
شكراً لحفاوتك سيدي ولكن لا اظننى استطيع ان اعطي رأي او انطباع عن الموقع خاصة وانا من الزوار من فترة لاخرى
ولكن يمكنني ان اقول بانني استمتع كلما دخلت الى هنا ولعلني احياناً استفيد كذلك فلكم الشكر اجزله على ما تقدمونه في صالون العازة وحوش العازة وبيت العازة ومؤكداً لو انني وجدت الزمن الكافي ساحضر الى هنا لكي ننهل من معينكم وبعض الرحيق .
لكن عايز احكي حكاية زول مليان ومدفق ، حكاية زول مقدود ويدفق ، يدفق في الحزن كيمان ولعلى الكديسة قد زارتني قبل فترة من الزمن فخربشت خربشات اردت ان اكتبها هنا لكي اسمع رأيكم وبالاخص الشاعرة المبدعة ست الدار التى قرأت لها ما يجبر الخاطر وينظم الاوتار كلها .
باكر وراك بيجي الزمن
شايل الفرح
ما أظن بقيد روحي فيك ساكت كده
ماك براك ضئ البدأ
صادفت مليون ألف لا
واصلت كل مشوار
مشيت مهما أبتدأ
تأسرني شان ياك الوحيد جواي ناره مولقدة
وتسقيني من مرً العذاب
وتجرح مشاعري وتؤده
لكن بحبك وبكرهك !
وعارفك جميل وبستقبحك
خليت مشاعري بلا اتزان
الله يميتني واريحك
حد ما أقول انساك ...ألقاك ذكرتي
وحد ما مشيت .. أنت الطريق لما ابتدي
فاصل اخير
أسدل ستاري واجيك جري
ويبقى الزمن من غير حياد
يجبرني للظالم اشتكي
اول تبادي ظلمني في حبي الكبير
وصبرت علو الجاي خير
ماكفاه ده ... خلاني انده واستجير
ولمن خلاص نفسي انقطع
باع لي النجوم عز الظهر
منظومة في منديل حرير
فاض بي عاد
اشكيك والا سكوتي خير !
وبعد ده كلو أنا ما يئس
عارف الزمن عجلة بتدور
ويمكن حبيبي تغيرو ..

هذا والله لا وراكم وجع المشاعر والتهاب الاحاسيس وحساسية الحب المعاكس ...

وقنبو طولا

[ست الدار]

باكر وراك بيجي الزمن
شايل الفرح
ما أظن بقيد روحي فيك ساكت كده ماك براك ضئ البدأ
صادفت مليون ألف لا
واصلت كل مشوار
مشيت مهما أبتدأ
تأسرني شان ياك الوحيد جواي ناره مولقدة وتسقيني من مرً العذاب
وتجرح مشاعري وتؤده لكن بحبك وبكرهك !
وعارفك جميل وبستقبحك
خليت مشاعري بلا اتزان
الله يميتني واريحك
حد ما أقول انساك ...ألقاك ذكرتي
وحد ما مشيت .. أنت الطريق لما ابتدي
فاصل اخير
أسدل ستاري واجيك جري
ويبقى الزمن من غير حياد
يجبرني للظالم اشتكي
اول تبادي ظلمني في حبي الكبير
وصبرت علو الجاي خير
ماكفاه ده ... خلاني انده واستجير
ولمن خلاص نفسي انقطع
باع لي النجوم عز الظهر
منظومة في منديل حرير
فاض بي عاد
اشكيك والا سكوتي خير !
وبعد ده كلو أنا ما يئس
عارف الزمن عجلة بتدور
ويمكن حبيبي تغيرو ..





الاخ الكريم ، شكرا لكلماتك الرقيقة ، وسعيدة جدا تواصلنا معاك من قدام الباب ، ( داير تجيب لينا الهوا ... يقولوا شنو الحريم واقفات في البيبان كدا ) طبعا نحنا ديواننا .. باب من الف باب !!

بالنسبة للكلمات التي ارسلتها .. بعيدا عن اللغة والموسيقى وكل الكلام الكتير داك ... فأنا قد لمست فيها احساس قوي جدا ... وصدق مشاعر كثيف واكيد دي اهم خطوة في الكتابة ضرورة توصيل احساسك للمتلقي .. فشكرا لك !!

واعجبني جدا ... ان أقرأ لك .. مثل هذا البوح الشجاع ، اتمنى ان تواصل الكتابة .. وان نقرا لك المزيد .. وعازة مليئة بشعراء يقرضوا هذا النوع من الشعر ... ( انا طبعا بليدة في الشعر الدارجي والغنائي )

أتمنى ان نتابعك عبر منتديات عازة ..


تحياتي

ولي عودة


ستووو